Küçük ayın 21 kutlanȇr  Bütün dünnä ana dilin günü. Brakılmadı dikkatsız  bu gün. Rayon  bölümün  işçileri soruşlar için üürenmek, kultur, gençlik hem sport  Galaslı L, Çavdar L   gösterdilär prezentaţiyayi temaya: “Dil -- en paalı halkın koruntusu.”  Orta rayon  bibliotekasında yortuya kuruldu sergen ana dilin temasına üç dildä: gagauz, rumin hem rus. 39 üürenici A Moşkovun liţeyindän 16-18 yaşında denedilär açıklamaa  ana dilin derin maanasını adamın, milletin hem  halkın yaşamasında.  Bakıldı soruşlar: nedir dil, angı maanaları o gerçekler, neyi açıklȇȇr ana dilin sözü? 

Bütün dünnä ana dilin gününüdä  biz geldik meraklı çıkışlara.  Te bir kaçı onnardan:

Bizi birleştirer, yakınnadȇr diil birtürlü annamakların hem  yaptıkların adlanması. Bunu yapȇr  ana sözün  açık demeklii,içankı maanası, ayırıca onda toplu birleştirici kuvet.

Sade ana dilindä saklanȇr derin maana, nica duada. O yaradȇr canında saygıyi sevgiyi, iilii da kurȇr suskun usluluu, angısından peydalanȇr käämillik, üüseklik hem bitkisiz gözäl dünnä.

Gagauzlar  dostlu yaşayarak kardaş  halklarınnan bizim Bucakta, Moldova devletindä üürenärkän rus dilindä, annaşabilirkän rumın,bolgar,ukrain, engliz dillerindä tolerant davranmasını belli ederlär!

Ormanji  Anastasiya; «Ana dilimiz —ruhun sesi.  Dil o dooruluk yalpaklık»;

Kurudimov  Vladimir: «Ana dili ruh zenginnii, canın açıklanması,  fikirin canı»;

Stınga Lena: «Dil cannı,  onda toplu dedelerimizin fikiri, duyguları, en büük ne var dünndä—vatanımız! Ana dilimiz  bizi birleştirer. O verer bizä annaşmak, sevgi, havez, dooruluk. Sade bu dil yapȇr ruhumuzu taa kaavi hem taa ii».